"Sino ba ako?"
Isang katanungang paulit-ulit na sumagi sa aking isipan.
"Sino ba ako?"
Isang pagkataong hinanap sa mundo.
"Sino nga ba ako?"
Kay dami na ng kolorete na ipahid ko sa aking mukha,
mga tinta na iginuhit upang makiuso sa iba,
ngunit bakit di ko pa din makita ang aking ganda?
"Sino nga ba ako?"
Kahit gaano pa kagara ang aking porma,
mamahalin man o nabili sa bangketa,
itsurang pinaglaanan ng pera
Ngunit di ko pa din madama ang aking halaga!
"Sino nga ba ako?"
Sa dami ng aking kaibigan,
maghapon pa nila akong paligiran,
tumambay at magtawanan
ngunit di pa din mawalay sa aking isipan
na mayroong kawalan na di nila kailanman mapupunan.
"Sino nga ba ako?"
Sa gitna ng talino ko at tagumpay,
mga kaalamang taglay
upang sa iba ay magmukhang mahusay
bakit meron pa ring puwang sa puso ko na walang humpay?
"Sino nga ba ako?
Sino nga ba ako?"
Sa gitna ng ingay na umaalingasaw,
sa bawat pagsigaw ng aking katanungan
upang malaman ang katotohanan
nakita ko ang kasagutan sa Iyo,
narinig ko ang tinig mo,
tinatanong ako..
"Anak, sino ba Ako?
Ako ang lumikha sa’yo
ginuhit ko ang iyong pagkatao,
bilang ko ang araw mo
at bago ka pa nabuhay sa mundo,
palagi ka nang nasa isip ko."
"Anak, sino ba Ako?
Ang mga mata ko na nakakita sa mga kasalanan mo,
ay siya ring mata na nakasusumpong sa ganda na itinanim ko sa iyo.
'di magsasawang ikaw ay pagmasdan,
sa akin ikaw ay kaaya-ayang tignan
kesa sa mga butuin at kalawakan."
"Anak, sino ba Ako?
Ang mga bisig ko’ng nilayuan mong pilit
ang yayakap sayo ng mahigpit
upang malimutan mo ang sakit
na naidulot sayo nitong mundong malupit.
"Anak, sino ba Ako?
Bago ka pa natutong magkasala,
at bago mo pa natutunan ang depinisyon ng salitang paghanga.
Bago ka mawalay sa aking presensya
upang habulin ang pagtingin ng iba
upang matanggap ka ng iyong barkada
naroroon na Ako..."
"Ako ang iyong simula,
minahal na kita, bago pa kita nilikha.
Naroon ako, kasama mo, di mo lang halata.
Naroon ako sa iyong bukas,
sa iyong pagwawakas
sa dulo ng iyong kabanata
naghihintay na matapos mo ang karera
netong buhay na sayo ay Aking ibinigay.
Narito ako ngayon
kasama mo mula pag gising
hanggang buong maghapon
maging sa panaginip,
dinuduyan kita sa aking pag ibig.
Hindi kita iniwan, at di kita iiwan
Emmanuel ang aking pangalan
at palagi mo akong masusumpungan."
"Anak, sino ba Ako?
Bago ka pa nabigo sa paghahanap ng iyong pagkatao
bago pa ang luha mo ay tumulo,
anak, nauna nang pumatak ang dugo Ko para sa iyo
doon sa bundok ng kalbaryo
upang ang kasinungalingan ng iyong pagkatao
na itinanim sayo ng mundo
ay mabura ng wagas na pag-ibig ko sayo.
Dahil anak, sapat Ako para sayo.
Anak, napakaganda mo sa paningin Ko.
Anak, wala nang papatay sayo,
kaya kitang mahalin ng buong buo"
"Kaya’t di mo na kailangan magkumpara,
'di mo na kailangan tumingin sa iba
huwag ka nang magduda,
sakdalan ng pag-ibig ko sayo ay akin nang naipakita.
Anak, lumapit ka sa akin,
Ako ay iyong kilalanin
pag-ibig Ko ay di magmamaliw.
Lumapit ka sa Akin at iyong alalahanin
kung sino ba Ako."
Comentarios